APA-Zaqatala - Xəbərlər

Siyasi, Hadisə, Maraqlı

Azərbaycanın Zaqatala rayonunda kəndə hücum edən canavarlar 35 heyvanı parçalayıb

Zaqatala.Hafiz Heydərov-APA. tarih 08.02.2008, 14:22 (UTC)

Zaqatala.Hafiz Heydərov-APA. Azərbaycanın Zaqatala rayonunda quduzlaşmış canavarlar kəndə hücum edib. APA-nın Şəki-Zaqatala bürosunun məlumatına görə, hadisə ötən gecə rayonun Qımır kəndində baş verib.

Kənd sakini Mahir Atayevin həyətindəki tövləyə hücum edən canavarlar onun şəxsi təsərrüfatında olan 35 baş xırdabuynuzlu heyvanı məhv edib. Hadisədən dərhal sonra rayon Baytarlıq İdarəsinə məlumat verilib. Canavarların parçaladığı heyvanlar baytar həkimlərin nəzarəti ilə xüsusi şəraitdə basdırılıb. Ev sahibinin sözlərinə görə, kəndin yaxınlığındakı meşədə məskunlaşan canavarları kənd ərazisində tez-tez görünürlər. Ov silahlarının olmaması canavarların məhv edilməsində kənd sakinləri üçün problem yaradır.

Azərbaycanın Balakən rayonunda yanacaqdoldurma məntəqəsinin işçisi güllələnib

Hafiz Heyder tarih 29.01.2008, 11:58 (UTC)

Balakəndə yerləşən yanacaqdoldurma məntəqələrindən birində ağır cinayət hadisəsi baş verib. Rayon Polis Şöbəsindən APA-nın Şəki-Zaqatala bürosuna bildirilib ki, naməlum şəxs məntəqənin işçisi, şəhər sakini, 1962-ci il təvəllüdlü Piriyev Nəriman Zahid oğlunu iş yerində güllələyib. Ağır xəsarət alaraq xəstəxanaya çatdırılan N. Piriyevin üzərində cərrahiyə əməliyyatı aparılıb. Sol döş nahiyəsindən yaralanan N. Piriyevin vəziyyəti ağırdır. İlkin versiyaya görə, hadisə şəxsi münaqişə zəminində baş verib. Faktla bağlı araşdırma aparılır, əməliyyat-axtarış tədbirləri həyata keçirilir. /APA/

Azərbaycanın Zaqatala rayonunun sakini itkin düşüb

Hafiz Heyder tarih 29.01.2008, 11:57 (UTC)

Zaqatala rayonunun 55 yaşlı sakini itkin düşüb. Zaqatala rayon Polis Şöbəsindən (RPŞ) APA-nın Şəki-Zaqatala bürosuna verilən məlumata görə, rayonun Aşağı Tala kənd sakini, 1953-cü il təvəllüdlü Ramiz Həmid oğlu İsgəndərov 6 gündür, yoxa çıxıb.

Ailəsindən bildirilib ki, R. İsgəndərov rayondakı istehsalat kombinatında çilingər işləyib. Yanvarın 23-də o, işi getmək adı ilə evdən çıxıb və bir daha geri qayıtmayıb. Həmin gün iş yoldaşları ilə gecə saatlarınadək yeyib-içməkdə olan R. İsgəndərovun onlardan ayrılarkən sərxoş olduğu bildirilir. Zaqatala RPŞ-də R. İsgəndərov barəsində axtarış elan edilib, onun tapılması üçün əməliyyat-axtarış tədbirləri həyata keçirilir. Qeyd edək ki, R. İsgəndərov iki övlad atasıdır. /APA/

Rusiyada yaşayan Zaqatala sakini arvadının başını kəsərək qətlə yetirib

Hafiz Heyder tarih 26.01.2008, 06:43 (UTC)

Rusiyada yaşayan Zaqatala sakini arvadının başını kəsərək qətlə yetirib. APA-nın Şəki-Zaqatala bürosunun məlumatına görə, hadisə Rusiya Federasiyasının Mirnıy şəhərində baş verib.

Zaqatala rayonunun Əliabad qəsəbə sakini, 1972-ci il təvəllüdlü Hüseyn Əli oğlu İbrahimov qısqanclıq zəmnində həyat yoldaşı, 1976-cı il təvəllüdlü Nəzakət Ramazan qızı İbrahimovanın başını kəsərək qətlə yetirib. Mərhumun qohumlarının verdiyi məlumata görə, N. İbrahimovanın cəsədi bu gün doğulduğu Əliabad qəsəbəsinə gətirilərək torpağa tapşırılıb. Cinayəti törədən H. İbrahimov isə Rusiyada həbs olunub.
Qeyd edək ki, İbrahimovların iki övladı var. /APA/

Azərbaycanın Şəki şəhərində keçirilən xüsusi əməliyyat nəticəsində “kriminal avtoritet” həbs olunub

APA tarih 08.01.2008, 13:53 (UTC)

Bu gün Azərbaycan Daxili İşlər Nazirliyinin Baş Cinayət-Axtarış, Baş Mütəşəkkil Cinayətkarlıqla Mübarizə İdarəsi və Şəki şəhər Polis Şöbəsinin əməkdaşları Şəki şəhərində xüsusi əməliyyat keçirib.

Şəki şəhər Polis Şöbəsindən APA-ya verilən məlumata görə, əməliyyat hüquq-mühafizə orqanlarına daxil olan məlumat əsasında həyata keçirilib. Əməliyyat zamanı Şəkidə anadan olmuş, kriminal aləmdə “Dəhnəli Elçin” kimi tanınan və hazırda Rusiyada yaşayan Elçin Cəlilov sürücüsü Qurban İlyasovla birlikdə yaxalanıb. Saxlanılarkən onların üzərindən və E. Cəlilova məxsus “Lexus” markalı avtomobildən heroin götürülüb.
APA-ya daxil olan digər məlumatlara görə, əməliyyat zamanı polisə müqavimət göstərən şəxslərdən birinin əlində qumbara partlayıb. Bu hadisə Şəki rayon Polis Şöbəsinin yaxınlığında baş verib. Əməliyyat keçirilərkən yaralananların olub-olmadığı barədə məlumat verilməsə də, yerli sakinlər hadisə yerinə təcili tibbi yardım maşınının gəldiyini bildiriblər.
Azərbaycan DİN-in mətbuat xidmətinin əməkdaşı Ehsan Zahidov APA-ya əməliyyatın keçirildiyini və yuxarıda adı çəkilən şəxslərin həbs olunduğunu təsdiqləyib. O, saxlanılanlardan narkotik maddə götürüldüyünü, araşdırmaların nəticəsinə uyğun olaraq cinayət işinin başlanılacağını bildirib. /APA/

Azərbaycanın paytaxtı Bakıya güclü qar yağıb

APA tarih 07.01.2008, 08:34 (UTC)

Dünən günorta saatlarından başlayaraq Bakıya güclü qar yağıb. APA-nın məlumatına görə, bu saatlara qədər fasiləsiz davam edən qar yağıntısı paytaxtın həyatında ciddi problemlərlə müşayiət olunur.

Şəhərin bəzi yerlərində yağan qarın qalınlığı 60 santimetrə çatıb. Qar yağıntısı ilə əlaqədar paytaxtda nəqliyyatın hərəkətində ciddi problemlər yaranıb. Yolların buz bağlaması şəhərin əksər yerlərində sərnişin avtobusları və avtomobillərin hərəkətini məhdudlaşdırılıb. Xüsusilə metronun 20 Yanvar stansiyası yaxınlığındakı yollarda nəqliyyatın hərəkətində ciddi problemlər var. Nəqliyyat problemi ilə əlaqədar Bakı Metropolitenindən istifadə edən sərnişinlərin sayı artıb. Hazırda paytaxtda qar yağıntısı davam edir. /APA/

<- Geri

1 2 3 4 5 6 7

Devam ->