APA-Zaqatala - Xəbərlər

Siyasi, Hadisə, Maraqlı

Azərbaycanın Qax rayonunda 18 yaşlı qız özünü asıb

Hafiz Heyderov tarih 21.03.2008, 07:08 (UTC)

Qax. Hafiz Heydərov - APA. Azərbaycanın Qax rayonunda 18 yaşlı qız özünü asıb. Qax Rayon Polis Şöbəsindən APA-nın Şəki-Zaqatala bürosuna verilən məlumata görə, hadisə ötən gecə saat 23:00 radələrində baş verib.

Qax rayon sakini, 1990-cı il təvəllüdlü Gözəl Süleyman qızı Məmmədova yaşadığı həyətdə meyvə ağacından özünü asaraq intihar edib. Faktla bağlı Qax Rayon Prokurorluğunda cinayət işi açılıb, araşdırma aparılır.

Novruz bayramınız mübarək!

Hafiz Heyderov tarih 20.03.2008, 07:24 (UTC)

Bu günlərdə bütün həmvətənlərimiz Novruz bayramını qeyd edir. Sabah səhər saatlarında Bahar ölkəmizə qədəm qoyacaq. Hər birinizin yazın gəlişini yeni əhval-ruhiyyədə, xoş ovqatla, gözəl Yurdumuzun hər guşəsində bayram tonqalları çatmaqla, isti ocağınızda ruzi-bərəkətli süfrələr arxasında qarşılamağınızı diləyirik.

Bu müqəddəs günlərdə Azərbaycanın ərazi bütövlüyü uğrunda şəhid olmuş oğullarımızın xatirəsini ehtiramla anaraq, qarşıdakı illərdə şəhidlərimizin qanı ilə sulanmış Qarabağ dağlarında böyük bayram tonqalları çatmağın hər birimizə nəsib olmasını arzulayırıq.
APA bütün həmvətənlərimizi Novruz bayramı münasibətilə təbrik edir, hər bir soydaşımıza şəxsi həyatında uğur, can sağlığı və ailə xoşbəxtliyi arzulayır.
Biz həmişə Sizin xəbər təminatçınız olaraq bu bayram günlərində də Sizinlə olacaq, daim isti xəbərlər çatdırmaq üçün fasiləsiz çalışacağıq.
Bayramınız mübarək!

Zaqatalada neolit dövrünə və eramızdan əvvəl III-I minilliklərə aid arxeoloji tapıntılar aşkarlanıb

Hafiz Heyder tarih 20.03.2008, 07:22 (UTC)

Zaqatala. Hafiz Heydərov - APA. Azərbaycanın Zaqatala rayonu ərazisində, Alazan çayı vadisində neolit dövrünə və eramızdan əvvəl III-I minilliklərə aid olan “Yalovlu Təpə” mədəniyyəti nümunələri sayılan arxeoloji tapıntılar aşkarlanıb.

Bu barədə APA-nın Şəki-Zaqatala bürosuna Zaqatala rayon Tarix Diyarşünaslıq Muzeyinin direktoru Cahangir Soltanov məlumat verib. C. Soltanov bildirib ki, tapıntılar Alazan çayının sol sahilində, Zaqatalanın Muğanlı kəndi yaxınlığında aşkar edilib. Ərazidə əkinçiliklə məşğul olan yerli sakinlər torpağın dərinliyindən neolit erasının daş dövrünə aid at dişi şəklində daşdan düzəldilmiş çapacaq, balıqçılıqla məşğul olan sakinlər isə Alazan çayının sol sahilindən “Yalovlu Təpə” mədəniyyətinə məxsus saxsı qablar tapıblar. C. Soltanov deyib ki, sözügedən ərazidən e.ə III-I minilliyə aid uşaq qəbirləri də aşkarlanıb. Qəbirlərdə uşaq ayağının sümükləri də var. Tapıntıları unikal adlandıran C. Soltanov sözügedən ərazinin zəngin tarixə malik olduğunu və orada arxeoloji qazıntıların aparılmasının zəruri olduğunu vurğulayıb.

Azərbaycan Ordusunun şəhid olmuş əsgəri Zaqatalada torpağa tapşırılıb

Hafiz Heyderov tarih 05.03.2008, 11:34 (UTC)

Zaqatala. Hafiz Heydərov-APA. Martın 4-də Ermənistan Silahlı Qüvvələrinin atəşkəsi pozulması nəticəsində Azərbaycan Ordusunun şəhid olmuş əsgəri, Zaqatala rayon sakini Nemət Tusayev anadan olduğu Car kəndində torpağa tapşırılıb. APA-nın Şəki-Zaqatala bürosunun məlumatına görə, dəfn mərasimində Zaqatala rayon İcra Hakimiyyətinin başçısı Asif Əsgərov, hüquq-mühafizə orqanlarının rəhbərləri və yerli sakinlər iştirak edib.
Qeyd edək ki, 1988-ci il təvəllüdlü N. Tusayev 2007-ci ilin yanvarında hərbi xidmətə çağırılıb.

Azərbaycan Müdafiə Nazirliyi: Düşmənin 12 əsgəri məhv edilib, 15 əsgəri isə yaralanıb

Hafiz Heyder tarih 05.03.2008, 09:42 (UTC)

Ermənistan Silahlı Qüvvələrinin bölmələri martın 4-də səhər saatlarından başlayaraq, növbəti dəfə atəşkəs rejimini pozub. Azərbaycan Müdafiə Nazirliyinin mətbuat xidmətindən APA-ya bildirilib ki, nəticədə cəbhənin bir neçə istiqamətində vəziyyət gərginləşib.

Düşmən Ermənistanın daxilində baş verən qanlı hadisələrdən, silahlı vətəndaş qarşıdurmasından beynəlxalq ictimaiyyətin diqqətini yayındırmaq məqsədilə bu cür təxribata əl atıb. Azərbaycan Ordusunun əsgərləri qəhrəmancasına düşmənin layiqli cavabını veriblər, ermənilərə ağır zərbələr endiriblər. Tərtər rayonunun Göyarx kəndi istiqamətində 12 erməni əsgəri məhv edilib, 15-i isə ağır yaralanıb. Vəziyyətinin mürəkkəbliyini nəzərə alan düşmən martın 5-də saat 01.00 radələrində atəşi dayandırmağa məcbur olub, hazırda həmin bölgədə nisbi sakitlikdir.
Atışma zamanı Azərbaycan Silahlı Qüvvələrinin 3 əsgəri - 1988-ci il təvəllüdlü Tusayev Nemət Həbibulla oğlu (2007-ci ilin yanvar ayında Zaqatala RHK-dan hərbi xidmətə çağırılıb), 1988-ci il təvəllüdlü Qasımov Yusif Oruc oğlu (2007-ci ilin oktyabr ayında Şəki RHK-dan hərbi xidmətə çağırılıb) və 1988-ci il təvəllüdlü İsmayılov Bəhruz Arzu oğlu (2006-cı ilin oktyabr ayında Şəki RHK-dan hərbi xidmətə çağırılıb) şəhid olub, 1988-ci il təvəllüdlü Alcanov Rövşən Xəzər oğlu (2006-cı ilin oktyabr ayında Qobustan RHK-dan hərbi xidmətə çağırılıb) yaralanıb. Martın 5-də gecə saatlarında isə Tərtər rayonunun Qızıl Oba kəndi istiqamətində düşmən mövqelərindən açılan atəş nəticəsində hərbçimiz 1978-ci il təvəllüdlü Səfərov Ceyhun Bahəddin oğlu (1996-cı ildə Xətai RHK-dan hərbi xidmətə çağırılıb) şəhid olub.
Müdafiə Nazirliyinin rəhbərliyi Vətən uğrunda şəhid olmuş əsgərlərimizə Allahdan rəhmət diləyir, belə qəhrəman övladlar böyüdən valideynlərə dözüm və səbir arzulayır.

Tərtər rayonunun Qapanlı kəndi istiqamətində Ermənistan və Azərbaycan Silahlı Qüvvələri arasında döyüş gedir

Hafiz Heyder tarih 05.03.2008, 09:40 (UTC)

Ermənistan Silahlı Qüvvələri Azərbaycanın Tərtər rayonunun Qapanlı kəndi istiqamətində hücuma keçib. APA-nın Qarabağ bürosunun məlumatına görə, səhər saat 11.00 radələrindən hücuma keçən ermənilərlə döyüşdə Azərbaycan tərəfi itki verib.

Azərbaycan Ordusunun iki hərbçisi - Zaqatala rayon Hərbi Komissarlığından hərbi xidmətə çağırılmış Nemət Qusayev və Şəki rayon Hərbi Komissarlığından hərbi xidmətə çağırılmış Yusif Qasımov düşmənlə döyüşdə şəhid olub. Goranboy rayonunun Tapqaraqoyunlu kəndi sakinləri Əliyev Rəhman Süleyman oğlu və Heydərov Mirələm Knyaz oğlu isə güllə yarası alıblar. Təsdiqlənməmiş məlumatlara görə, şəhid olanların və xəsarət alanların sayı daha çoxdur. Qarşı tərəfin də xeyli sayda itki verdiyi bildirilir. Hazırda atışma davam edir.
Azərbaycan Müdafiə Nazirliyinin mətbuat xidmətinin rəisi Eldar Sabiroğlu APA-ya bildirib ki, atışma davam edir, ətraflı məlumat daha sonra veriləcək.

<-Geri

1 2 3 4 5 6 7

Devam ->